"مسلم
ومسيحى"
مسلم ومسيحى مفيش مشكله
كلنا اخوات ومصر أمنا
يا خلق الله الدين لله
ومصر الغالية لينا كلنا
مين فينا اتولد من غير ديانته
الكل اتولد لباباه ومامته
اتربى وكبر مؤمن برسالته
صح أو غلط منه لربنا
هو اللى يحاسب أما نحاسب
لجل المراكب ما تعدى بنا
مسلم ومسيحى مفيش مشكله
ليه قالوا وقلنا ليه كانوا وكنا
ليه إن وأن ليه ننسى عقولنا
ايه غيّر حالنا ومشينا وراه
يا خلق الله الدين لله
ومصر الغالية لنا كلنا
مسلم ومسيحى مفيش مشكله
يا ناس يا هوه بكره ارحموه
أحسن نتوه من بعضنا
وندى الفرصة لوحوش كاسره
وتبقى كارثه وحلت بنا
وبدل الضحكه تحل الآه
يا خلق الله الدين لله
ومصر الغالية لينا كلنا
مسلم ومسيحى مفيش مشكله
قولوا لأبو جهل كلنا أهل
أما انت يا جهل من غير أهل
هنا أو هنا وماانتاش مننا
نبتك شيطانى شرير عدوانى
وحياة قرآنى ما تعيش وسطنا
وحياة انجيلى وشمسى ونيلى
مهما تحكيلى ماانتاش مننا
احنا الأحباب وانت الأرهاب
احنا الصادقين وانت الكداب
احنا الملايين لكن انت مين
واحد عشرين؟ لو ألف بلاه
يا خلق الله الدين لله
ومصر الغاليه لينا كلنا
مسلم ومسيحى مفيش مشكله
عيسى نبى ومحمد نبى
وحياة النبى وكل نبى لو فينا غبى
انت الغبى ولا تهمنا
ولا تهزنا وماانتاش مننا
كلنا اخوات صبيان وبنات
رجاله ستات كل الأوقات ومفيش مشكله
مسلم ومسيحى مفيش مشكله
كلنا اخوات ومصر أمنا
منقول
ليست هناك تعليقات:
إرسال تعليق